Inlawlawag ni Engr. Bonifacio Dela Peña,City Administrator ti Baguio City ti rason nu apay a daduma kadagiti proyekto iti siudad ket saan pay a naileppas wenno saan pay a naipatungpal.
Daytoy ket gapu iti parikut kadagiti proyekto a pakairamanan ti “change of order” wenno ti kasapulan a panakabaliw ti maysa a proyekto.
Malaksid iti dayta, saan a maipatungpal ti proyekto nu awan ti kontraktor a mangbid iti daytoy bayat a dumanon iti agarup maysa ken kagedwa a bulan ti kabiitan a procurement ken bidding ti maysa a proyekto.
Inlawlawag pay ni Dela Peña a saan a basta basta ti panakaileppas ti maysa a proyekto gapu ta tarigagayda a magun-od ti de-kalidad a proyekto.
Kabayatanna, impasigurado ti opisyales a “one is to one” ti agbalin a proyekto dagiti barbaro nga Architects a napili ti siudad babaen iti impatungpalda a job order.
Pangpanggepen met ti lokal a gobyerno ti panakahire dagiti consultants, panaka-outsorce dagiti proyekto kas solusyon iti panakaleppas dagiti ado a nakalinya a proyekto ti siudad.
Impanamnama ni Dela Peña nga awan ti mapaspasamak a korapsyon kadagiti amin a proyekto ti siudad ken amin a pondo ket mapan kadagiti kontraktor.//Bombo Mera Pacpacan
