BAGUIO CITY – Dukduktalen pay laeng ti Pilar Municipal Police Station ti motibo iti panakapapatay ti re-elected councilor ti Pilar, Abra idi kanikadua.
Nabigbig daytoy a ni Amante Doral, 63-anyos, residente ti Kinabiti, Pilar, Abra babaen iti pammaltog.
Napasamak ti insidente kalpasan a nakipaset ti opisyal iti flag raising ceremony ken iti taripnongda kadagiti kakadwana nga opisyal.
Naamuan a kalpasan ti seremonya ket naglugan ti biktima ken ti anakna a ni Jocker Doral iti motorsiklo ken idi nakadanonda iti paset ti Barangay Narnara, Pilar ket killaat lattan a pinalpaltogan ti saan pay a nabigbig a suspek ti agama.
Natamaan ti likod ti biktima bayat a natamaan ti luppo ti anakna.
Naiturong dagitoy iti ospital ngem naideklara dead on arrival ti konsehal.
Narekober iti crime scene dagiti basyo ti bala ti M-16.
Agtultuloy ti imbestigasyun ti pulisya tapnu mabigbig ti kinasiasino i suspek ken ti kangrunaan a motibo ti krimen.
Nainget met a konkondenaren ti lokal a gobierno ken dagiti residente ti Pilar, Abra ti pannakapapatay ni Doral.
