BAGUIO CITY – Impeksa dagiti sumagmamano a pasahero dagiti jeep iti Baguio City ti reaksionda seknan iti petisyon ti transport group a manayonan ti tallo a pisos ti P9 nga agdama a plete.
Iti panakiuman ti Bombo Radyo Baguio, kinunada a dakkel a parigat kadakuada ti panakanayon ti plete gaputa saan nga amin ket addaan ti natalged ken napintas a panggedan.
Impetteng dagiti dadduma a saan a patas daytoy kadagiti agbibiyahe ti short trip agbalinen a P12 ti bayadanda a maipada iti P12 a baybayadan ita dagiti agbibiyahe ti long trip.
Impaganetget pay dagiti pasahero nga imbes a P9 ti plete iti short trip ket P10 ti singsingiren dagiti dadduma a driver/dispatcher ken mamingsan pay ket saandan nga isubli ti P1 a barya dagitoy.
Nupay kasta, kinunada a saanda a kidkiddawen ti P1 a barya kadagiti driver kas tulongda kadagitoy.
Impeksa dagiti pasahero a maawatanda ti arungaing dagiti driver gaputa nagsasaruno ti panagngato ti presyo ti gasolina ngem impettengda a nangato latta ti tallo a pisos a mainayon iti agdama a plete.
Gapu iti daytoy, isingsingasingda a no mapatgan ti apela dagiti driver/operators a manayonan ti plete ket P1 laeng ti mainayon tapno mabalanse met ti pakaseknan ti transport sector ken dagiti pasahero.
Nupay kasta, impaganetget dagiti driver dagiti jeep a kurang pay ti P3 a kiddawda a mainayon iti agdama a plete.
Sigun kadagitoy, bassit laeng ti mapaspastrekanda gapu iti agtultuloy a panagngato ti presyo ti petrolyo.
Innayonda a naksayan pay ti bilang dagiti pasahero a mailugluganda gapu iti 50% seating capacity a pammilin ti nasional a gobierno.
Impettengda pay a dakkel ti epekto ti “Libreng Sakay” a programa ti gobyerno iti pamastrekkanda gaputa mamingsan ket awanen ti mailuganda a pasahero.
Immuna metten nga impatangken ti transport sector ti petisyon dagitoy a maipangato iti P12 ti plete kadagiti parapasahero a jeep iti Cordillera.
