BAGUIO CITY – Napaay manen ti dadaulo ti Registry of Deeds – Baguio nga agparang iti sesyon ti lokal a konseho ti siudad kalpasan a naimbitaran daytoy tapnu agpalawag kadagiti alegasyon a sangsangwen dagitoy.
Iti panakiyuman ti Bombo Radyo, kinuna ni Councilor Faustino Olowan, chair ti Committee on Laws iti City Council nga adda ti inasikaso ni Registry of Deeds – Baguio officer-in-charge Rodil Rivera isut gapuna a saan daytoy a nakadar-ay iti sesyon.
Kinunana nga iti baet daytoy ket ipaayanda manen iti gundaway ti nasao nga opisyal nga agparang iti sumaruno a sesyon.
Imbilinda met kadagiti complainants, pakairamanan ti maysa nga abogado a retirado a director ti Public Attorney’s Office ti panangaramid dagitoy iti pormal a reklamo nga addaan notary tapnu dagitoy ti agserbi a complaint kontra iti nasao nga opisina.
Innayonna pay a no saan manen nga agparang ti dadaulo ti Registry of Deeds – Baguio ken ti staff daytoy ket posible nga ipaima ti konseho ti formal complaint kadagiti umno nga ahensia kas iti Ombudsman wenno kadagiti investigating agencies para iti kaskenan nga aksion.
Maipalagip nga iti sesyon ti konseho idi napalabas a lawas ket nagparang dagiti agarup uppat a complainants ken inreklamoda ti maatap a panagkiddaw ni Rivera ken ti staff daytoy iti panangiruar dagiti complainants iti agarup P5,000 kasukat ti napartak a panakaipaay ti titulo ti daga dagitoy iti baet a kompleto dagiti dokumento dagitoy.
