BAGUIO CITY – Maibilbilang a narisgu ti sibubukel a rehion Cordillera iti ginggined gapu iti kaadda dagiti earthquake generator iti amin a probinsya daytoy.
Iti interview ti Bombo Radyo kenni Frankie Cortez, Operations Officer iti Office of the Civil Defense – Cordillera, maysa a tuttutukanda ti partisipasyon iti publiko kadagiti maisaysayangkat a disaster preparedness activites kas iti maangay a national simultaneous earthquake drill inton Marso 25 nu sadino, manarimaan ti koordinasyon iti nasao nga opisina kadagiti Local Government Units, Civil Society Organizations, ken pribado a sektor.
Sigun kenni Cortez, umad-adon ti makipaspaset kadagiti earthquake drill kasaruno ti napasaran a ginggined idi laeng 2022.
Innayonna a nasayaat a sublian dagiti adal manipod iti nasao a didigra ken aramaten daytoy kas jumpstart tapno maisaganaan dagiti sumarsaruno pay.
Kabayatanna, manamnama a maammoan ti partikular a lugar ditoy rehion a maibilang kas pilot area a pakaisayangkatan ti earthquake drill inton bulan ti Abril.
Iti sabali a bangir, maysa a kritikal nga addang nga ipatpatungpal ti nasao nga opisina iti agdama ket ti structural integrity assessment nu sadino kasapulan ti nainget a panangtulnog kadagiti safety code.
Inaklon pay ti nasao nga opisyal a maysa kadagiti karit ti panangbalanse iti development ken environmental safety gapu ta umad-adun dagiti maipaspasdek nga establishimento iti agdama.
Sigun pay kenni Cortez, kagiddan ti panagpadur-as kadagiti komunidad ket masapol metlaeng nga ikonsidera ti panangsalaknib iti aglawlawa kasta met ti kinatalged iti publiko.//Bombo Rob Dominguez
