Saan a nakaro a naapektaran ti rehiyon Cordillera iti panagdalapos ti bagyo a ni Julian ngem ngimmato ti presyo iti kangrunaan a nateng gapu iti panakaitantan ti delivery daytoy.
Iti panakiuman ti Bombo Radyo kenni Jonathan Llanes, Information Officer iti Regional Agriculture and Fisheries Information Section ti Department of Agriculture – Cordillera, bassit ti naapektaran ti bagyo iti mais ken pagay gapu ta kaap-apit dagiti mannalon kadagiti mula da partikular iti Kalinga ken Apayao.
Kabayatanna, manamnama a matulongan ti 355 mannalon a naapektaran ti bagyo a Julian babaen iti tulong ti PCIC Region 2 a manginsakop iti Kalinga, Ifugao ken Apayao.
Gapu iti dayta, agtultuloy ti panagallukoy ti opisina kadagiti amin a mannalon nga agparehistro dagitoy iti programa ti ahensiya tapno maipaayanda ti suporta kas iti insurance.
Iti sabali a bangir, inlawlawag ni Llanes a ti panagbalbaliw iti presyo dagiti nateng ket gapu iti epekto ti bagyo nga Julian a nangitunda iti panakadelay ti delivery daytoy nga agturong partikular idiay Metro Manila.
