Kinondenar iti Makabayan Bloc ti resolusyon iti Senado a mangkidkiddaw iti International Criminal Court (ICC) nga ipaisidong iti house arrest ni sigud a president Rodrigo Duterte.
Sigun iti nasao a grupo, saan a nainkalintegan ti tignay ti Senado ken maysa daytoy a wagas tapno kaluban ti maatap a krimen nga inaramid ni Duterte kabayatan ti nadara a kampanya ti administrasyonna kontra iligal a droga.
Ti resolusyon ket inawagan ni Representative Antonio Tinio a panangkusit iti hustisya; inladawan met ni Representative Renee Louise Co daytoy kas political maneuver tapno maprotektaran ni Duterte ken dagiti kaalyado daytoy bayat a kinuna met ni Representative Sarah Elago a maysa daytoy a panang-insulto kadagiti pamilya a nabiktima.
Kagiddan dayta, kiniddaw ti nasao a grupo iti ICC nga ituloy ti kaso kontra kenni FPRRD ken impettengda a ti house arrest para iti daytoy ket maysa nga insulto kadagiti biktima iti nadara kampanya kontra iligal a droga.
