Saan nga isubmitir ti House Quad Committee iti International Criminal Court (ICC) dagiti naduktalanda maipapan kadagiti pimmusay a mainaig iti drug war kabayatan ti administrasion ni Duterte, sigun kenni panel Chairperson Robert Ace Barbers.
Inlawlawag idi kalman ni Barbers a sipud idi saan a kameng ti Pilipinas iti International Criminal Court, ti resulta ti imbestigasion ti Quad Committee ket maaramat laeng para iti “domestic purposes.”
Impasigurado ni Barbers a saanda nga ipaay ti resulta uray pay dumawatda ti resulta gaputa saanen a paset ti Pilipinas iti nasao a korte.
Kinunana a maidatag laeng iti Department of Justice (DOJ) ti progress report ken dadduma pay a mainaig a dokumento ti panel.
Impaganetget ni Barbers nga agtakderda a sititibker iti kinuna ni President Ferdinand Marcos Jr. a nu kayat ti ICC a mangimbestigar ket aramidenda ti kabaelanda, ngem kasapulan met a mangalada kadagiti agbalin a saksi ken documentary evidence kadagiti kayatda a pag-alaan.
Maipalagip a pormal a nagikkat ti Pilipinas iti Rome Statute, a nangipasdek iti ICC, idi Marso 2018 babaen ti administrasion ni President Rodrigo Duterte.
Nag-epektibo ti pannakaikkat kalpasan ti makatawen.
