BAGUIO CITY – Natalgeden ti maysa a motorcycle rider kalpasan a naispal daytoy manipud iti panakatnagna iti rangkis sadiay Sitio Inidian, Brgy. Ambuklao, Bokod, Benguet idi kanikadua.
Maibasar iti report ti Bokod Fire Station, manarimaan ti panangwanawan dagitoy iti forest fire sadiay Barangay Poblacion, Bokod, Benguet idi nakaawatda iti report seknan iti motorcycle accident.
Dagus dagitoy a nagresponde ken nangisayangkatda iti rescue operation kabinnadang dagiti pulis ti Bokod, Ambuklao Emergency Response Team ken dagiti sibilyan.
Naispal ti biktima a nabigbig a ni Shernan Nabong manipud iti nakatnagan daytoy a rangkis nga addaan kauneg nga agarup nasurok 40 a metro.
Naamuan a napasamak ti aksidente kabayatan ti panagdalyasat wenno panagmotorsiklo ti biktima ken dagiti kakadwa daytoy a riders iti deppaar ti Benguet-Nueva Viscaya National Road para iti 2020 Quezon City Endurance Challenge.
Naamuan pay a liniklikan ti biktima ti nakasabat daytoy a van a nagresulta iti panakaipurwakna iuti rangkis bayat a naibati ti motorsiklona iti parapet wenno iti igid ti kalsada.
