Nagbakwit ti rinnibu a tattao sadiay Bicol Region, gapu iti nakaru nga angin ken panagtudtudo a mapaspasaran dagiti sumagmamano a lugar nga intunda ti Tropical Storm Kristine.
Sumagmamano kadagiti residente ti agkidkiddaw iti tulong kalpasan a na-trap dagitoy iti uneg ti pagtaenganda gapu iti panaglayus sadiay Barangay Iraya Sur, Oas, Albay idi Martes, October 22.
Iti agdama dumanon iti dua pulo ket dua a tattao ti naispal iti Cabangan, Legazpi bayat a manaripaan paylaeng ti maipatpatunggal a rescue operation iti nasao a lugar.
Kabayatanna, sumagmamano a rangtay ti narba bayat a nalayus dagiti sumagmamano a pagtaengan sadiay.
Iti sabali a bangir, nagaburan iti lahar ken bato manipud iti Mayon Volcano dagiti sumagmamano a paset ti Guinatan, Albay bayat a maysa a 36-anyos a lalaki ti nagaburan gapu iti panagreggaay a napasamak iti Ligao City, Albay.
Immunan a nagballaag ti PAGASA a posible a pumigsa ti Tropical Tropical Storm Kristine sakabay nga aglandfall daytoy.
Innayon ti nasao nga ahensia a posible nga umikkat daytoy iti Philippine Area of Responsibility intun Biernes, October 25, 2024.
