Dinayyeg ti napigsa a magnitude 8.8 a genggened ti eastern Kamchatka Peninsula ti Russia iti alas 11:25 ti agsapa, local time iti agdama a Miyerkules.
Addaan ti kauneg a 20.7 kilometers ken narikna metlaeng ti serye ti napigsa nga aftershocks iti lugar.
Nagresulta ti napigsa a genggened ti pannakadadael ti maysa a kindergarten ti Petropavlovsk-Kamchatsky ken maam-ammuan pay ti kinalawa ti nadadael wenno casualty iti panagtama ti napigsa a genggened.
Nangipaulog metten dagiti otoridad ti tsunami warnings ken advisories ti sumagmamano a pagilian iti Pacific coasts karaman ti Pilipinas, Indonesia, Japan ken Russia ken naballakadan dagiti residente a naapektaran nga agbakwit paturong iti nangato a lugar.
Mainaig iti daytoy, nakailista ti tsunami nga addaan ti kangato a 3-4 meter wenno 10-13 feet iti sumagmamano a paset ti Kamchatka idiay Russia.
Nangitunda pay ti tsunami iti panaglayos iti paset ti Severo-Kurilsk nga addaan ti 2,000 a populasyon.
Idiay Japan, napasamak ti umuna a waves nga addaan ti kangato a 30 centemiters iti siudad ti Hokkaido iti northern Japan ken imbalakad pay dagiti otoridad ti posible a nagdadakkel a “waves.”
Nangipaulog metten dagiti otoridad idiay Amerika ti tsunami warnings idiay Alaska ken Hawaii.
Epektibo metlaeng ti tsunami watch idiay US island territory ti Guam ken dadduma pay nga isla ti Micronesia.
Ti magnitude 8.8 a genggened a timmama idiay Rusia ti maika-innem a napigsa a panagdayyeg a nailista iti pakaistoryaan ti sangalubungan.
Simmaruno ditoy ti napigsa a panagdayyeg a timmama idi tawen 2020 idiay Biobio, Chile a nakatayan ti 523 nga indibidual ken nangapektar iti 370,000 a balay ken ti panagdayyeg a timmama idi 1906 idiay Esmeraldas, Ecuador a nakatayan ti 1,500 nga indibidual a narikna pay idiay San Francisco.
