Kidkiddawen ni Russian vlogger Vitaly Zdorovetskiy, nga agdama a nakabalud gapu iti panangriribukna kadagiti Pilipino iti publiko para iti content-na, kenni Department of the Interior and Local Government Secretary Jonvic Remulla nga i-atrasna ti reklamo a naipila kontra kenkuana babaen ti panangdakamatna ti pakaseknan ti mental health.
Sigun kenni Remulla, nakaawat isuna ti surat manipod iti nasao a Russian vlogger.
Ngem sigun Remulla, saanna a palubusan a saan a madusa dagiti wagas nga inaramid ni Zdorovetskiy.
Impakaamo pay ti nasao nga opisial a maipilan iti korte inton sumaruno a lawas dagiti reklamo nga unjust vexation kontra kenni Zdorovetskiy gapu iti panangriribukna kadagiti tallo a security guard.
Dinakamat pay ni Remulla a pinadas ti legal team ni Zdorovetskiy a makisarita kadagiti security guards ngem saanda nga immanamong iti singasing ti legal team isut gapuna a maituloyda ti kaso.
