BAGUIO CITY – Nalidem a mailukat ti operasyon ti electronic bingo wenno e-bingo iti masakupan ti probinsiya ti Benguet.
Impasigurado daytoy ni Governor Melchor Diclas kagiddan ti panangkunana nga awan ti panggepna a mangaprobar iti panakailukat ti aniaman a kita ti iligal a sugal, pakairamanan ti e-bingo sadiay.
Kinunana a daytoy ket gaputa patienna a saan a nasayaat ti agbalin nga epekto daytoy kadagiti umili ken iti komunidad.
innayonna nga agtaltalinaed nga iligal ti e-bingo sadiay Benguet ken saan daytoy a prayoridad ti lokal a gobyerno.
Nupay kasta, dinakamatna nga adda met latta dagiti legal a sugal a nagna iti proseso iti Philippine Charity Sweepstakes Office.
Kabayatanna, inyunay-unay met ni La Trinidad, Benguet Mayor Romeo Salda a saan a pabor daytoy ken dagiti kaaduan nga umili sadiay iti panakailukat ti e-bingo iti masakupana a munisipyo.
Kinunana nga idi 2019 ket napaay wenno saan a naaprobaran iti lokal a konseho ti aplikasyon ti dua a grupo para iti panakailukat ti e-bingo sadiay La Trinidad.
Maipalagip a saan a napatgan ti aplikasyon para iti e-bingo iti siudad ti Baguio.
