BAGUIO CITY – Inlawlawag ni City Administrator Bonifacio dela Peña ti saan a panakairaman ti Baguio City iti probinsia ti Benguet a naipasidong iti Modified Enhanced Community Qurantine idi kalman agingga inton Mayo 23 ti agdama a tawen.
Kinunana a pinatgan ti IATF ti kiddaw ti lokal a gobyerno nga agtalinaed ti siudad iti General Community Quarantine agingga inton Mayo 31.
Inaklon ni dela Peña nga agtaltalinaed a kritikal ti sasaaden dagiti ospital gaputta dumanon iti 900 ti aktibo a kaso ti COVID-19 ngem impettengna nga agarup 30% kadagiti pasyente ket saan a residente iti siudad.
Nupay kasta, impagetgetna nga umdas paylaeng dagiti health facility ti siudad a mang-akomodar kadagitoy a pasyente.
Inayon pay ni dela Peña nga in-inot a mabakbakantean dagiti kwarto dagiti ospital gaputa maiturturong kadagiti nabigbig nga step-down facility partikular sadiay Santo Nino ken Teacher’s Camp dagiti pasyente nga agsagsagaba iti saan unay a nakaro a sintomas ti COVID-19.
