BAGUIO CITY – Nagkalintegan ti mayor ti Sablan, Benguet seknan iti dereliction of duty a naipila kontra kenkuana iti Office of the Ombudsman gapu iti maatap a panakapaayna a mangiparikep iti maysa a piggery farm sadiay a nakitaan ti panaglabsing iti naited iti daytoy nga environmental compliance certificate.
Sigun kenni Mayor Manuel Munar Jr., iti agdama ket awan pay ti naaw-awatna a surat wenno aniaman a dokumento manipud iti Ombudsman seknan iti nasao a kaso.
Kagiddan iti daytoy ket inlawlawagna a ti nangireklamo kenkuana ket addaan ti nainget a tarigagay a mangiparikep iti 5 Star Farms gapu kadagiti panaglabsingda a nangitunda iti polusyon iti angin ken iti danum iti asideg daytoy a waig.
Inyunay-unayna a nagtungpal ti nasao a pagtaraknan ti baboy kadagiti pagalagadan nga inyetnag ti Environmental Management Bureau-Cordillera kas iti de-population, panakatarimaan ti septic tank ken panakakalub dagiti kanal.
Nupay saan a naan-anay ti panakasurot dagiti naiyetnag a pagalagadan sadiay, kinuna ti mayor a nakontrol ken naksayan ti polusyon nga ituntunda ti nasao a pagbaboyan.
Dinakamatna a saan metlaeng a mabalin a maiparikep ti nasao a piggery farm gaputa sadiay nga agtataud ti suplay ti karne iti dadduma a paset ti Benguet ken iti Baguio City.
Sigun pay kenni Mayor Munar, adda ti nakalapna a report nga ilaklako ti complainant ti nasao a lote ngem awan ti manggatang gapu iti sitwasyon ti piggery farm.
ni Sablan, Benguet Mayor Manuel Munar Jr.
