Ita ti maudi nga aldaw a mangibiahe dagiti flower growers iti Benguet kadagiti in-order a sabong dagiti customerda idiay Manila ken dadduma pay a lugar para iti Valentine’s Day.
Iti panakiuman ti Bombo Radyo ken Andy Colte Sr., maysa a siyentistang magsasaka, adda dagiti truck a naituding nga agbiyahe agingga inton alas dose ti rabii.
Karaman kadagiti agbiahe dagiti aggapu iti KM 6 Betag, Tomay, Lubas, Alno, ken Shilan, La Trinidad, Benguet.
Sigun ken Colte, kadawyan a supsuplayanda ti Dimasalang, ken dadduma pay a suki dagitoy idiay Pampanga, Isabela, ken Cabanatuan.
Inaklon met ti opisyal a naobserbaranda a bimmaba ti volume dagiti sabong nga or-orderin dagiti sigud a supsuplayanda gapu metlaeng iti kaaddda dagiti imported a sabong.
Nupay kasta, agtultuloy latta ti panagmula dagiti flower growers para kadagiti pasken nga isagsaganaan dagitoy kas iti Valentine’s Day, Mother’s Day, Holy Week, All Souls’ Day ken All Saints’ Day, ken uray ti panawen ti Paskua.
Innayon pay ni Colte nga iti agdama, umad-adu dagiti agmulmula ken agpadpadas nga agventure iti sabong saan laeng iti Probinsya ti Benguet nu di ket uray iti dadduma pay a probinsya iti Rehion Cordillera.//Bombo Rob Dominguez
