BAGUIO CITY – Posible a nagtaud iti sabali a lugar wenno iti ruar ti Baguio ti sakit nga Equine Infectious Anemia a naduktalan kadagiti sumagmamano a kabalyo iti Wright Park ditoy siudad.
Maipalagip a 21 manipud iti 58 a kabalyo sadiay ti nagpositibo iti nasao a sakit dagiti kabalyo nga ituntunda ti retrovirus nga iyak-akar dagiti insekto.
Patien ni City Veterinarian Dr. Brigit Piok a naala dagiti kabalyo ti nasao a virus bayat ti panakaibiahe dagitoy paturong ditoy siudad wenno babaen iti insekto a kimmagat iti kabalyo nga addaan ti retrovirus.
Dinakamatna a napartak a maiyakar ti nasao a sakit kadagiti kabalyo babaen iti kagat dagiti insekto kas iti horse flies.
Inlawlawagna a gapu iti daytoy ket kasapulan a mai-isolate dagiti kabalyo iti kaadayo a 200-500 a metro manipud kadagiti dadduma pay a kabalyo sadiay Wright Park.
Manarimaan metten ti koordinasyonda kadagiti opisyales ti Barangay Lualhati a mangsaksakop iti Wright Park para iti panakasolosyon ti nasao a kasasaad dagiti kabalyo sadiay a maysa kadagiti daydaywen dagiti turista.
