Binabalaw dagiti human rights group sadiay Iraq ti baro a linteg a mangdusa kadagiti indibidwal a karaman iti LGBTQIA+ community, dagiti makipaset iti same-sex relationships, ken dagiti mangitandudo iti homosexuality ken prostitution.
Iti bileg ti nasao a linteg, mabalinen a pilaan ti kriminal a kaso dagiti lallaki a mangigaggagara nga agtignay kas maysa a babai, dagiti doktor a mangipatpatungpal ti gender reassignment surgery, kasta met dagiti karaman iti wife-swapping.
Mabalin a maibalud dagiti transgender iti las-od ti maysa agingga tallo(3) a tawen bayat a dagiti makipaset met iti same-sex relationships ket posible a maibalud iti las-od ti sangapulo(10) agingga sangapulo ket lima(15) a tawen.
Malaksid iti dayta, mabalin a maibalud iti saan a bumaba iti pito(7) a tawen ken mapagmulta iti saan a bumaba iti $7,600 dagiti karaman iti organisasyon a mangitantandudo iti “sexual deviancy”.
Kabayatanna, impeksa met dagiti sumagmamano nga opsiyal manipod sabali a pagilian ti kapanunutanda seknan iti baro a linteg sadiay Iraq.
Malaksid a nailadawan daytoy a narisgu, nakadadanag, maysa a klase ti diskriminasyon, ken mangpakapsot iti freedom of speech ken expression, posible a makaitunda ti nasao a linteg ti saan a nasayaat nga epekto iti ekonomiya ti nasao a pagilian.
Nupay kasta, indepensa met dagiti opisyales ti Iraq a ti nasao a linteg ket maysa a napateg nga addang tapno maprotektaran ken mapagtalinaed ti societal values dagitoy kasta met tapno maprotektaran dagiti agtutubo kadagiti moral depravity ken homosexuality.
