BAGUIO CITY – Pormalen a naglukat ti satellite office ti lokal a gobyerno ti Mankayan, Benguet sadiay Km. 6, La Trinidad, Benguet.
Agserbi ti nasao a satellite office a temporaryo nga opisina dagiti sumagmamano nga opisyales ti Mankayan para kadagiti umili ti munisipyo nga addaan napapateg a transaksion kadagiti nasao nga opisyales.
Sigun kenni Mayor Frenzel Ayong, mabalin metlaeng a maisayangkat sadiay dagiti transaksiyon ti Local Civil Registry Office ngem masapul nga urayen pay dagiti umili ti dokumento a kasapulanda iti nasao nga opisina.
Agserbi pay daytoy a drop-off center dagiti printed education modules a maiturong sadiay Mankayan nga aramaten dagiti estudyante para iti blended learning dagitoy.
Mangnamnama met ti mayor a babaen iti daytoy ket matulunganda dagiti umili ti Mankayan kadagiti transaksionda nga uray saanda nga agturong iti mismo a Municipal Hall dagitoy.
Pinagyamananna pay dagiti tulong ken kooperasyon dagiti padana nga opisyales ti Mankayan iti nasao a development.
