BAGUIO agbalballaag manen ti Department of Social Welfare and Development (DSWD) – Cordillera mainaig kadagiti text messages a mangkunkuna a maikari iti financial assistance para kadagiti senior citizen ti makaawat iti nasao a text message.
Daytoy ket kalpasan a nakaawat ti DSWD-CAR kadagiti report manipud iti nagduduma nga indibidual ken opisyales ti gobyerno a nakaawat ti text messages a maikari dagitoy iti tulong pinansial a para kadagiti senior citizens ken nasken laeng nga ag-email dagitoy iti maysa nga email address tapnu maamuanda ti kanayonan a detalye no kasano nga alaen ti nasao a tulong.
Impetteng ni DSWD-CAR Regional Director Arnel Garcia a saan a nagtaud iti ahensia dagiti nasao a text messages.
Imballaagna met ti peggad iti panangipatulod ti mensahe iti email address a nailanad iti text message.
Inlawlawagna a mabalin nga aramaten dagiti scammers ti personal information ti sender wenno biktima iti iligal nga aktibidad dagitoy.
Inyunay-unayna a dagiti maipaayan ti tulong pinansial manipud iti DSWD ket nasken a dumalan iti assessment babaen kadagiti otorisado a social workers ken saanda a pulos nga agkiddaw ti aniaman a personal nga impormasyon babaen iti saan a naberipikar nga email address.
Malaksid iti daytoy, impetteng ni Garcia a saan nga agkolkolektar ti DSWD iti aniaman a gatad kasukat ti panakairaman ti maseknan kadagiti programa ken serbisyo nga ipapaay ti ahensia.
Gapu iti daytoy, kidkiddawenna ti dagus a panagreport dagiti makaawat iti nasao a text message kadagiti otoridad wenno iti hotlines ti DSWD para iti kaskenan nga aksion.
