Agtultuloy latta ti search and rescue operation iti 16-anyos a lalaki a mapapati a naiyanod ken nalmes iti creek idiay Mamaga, Balili, La Trinidad, Benguet idi pay Setyembre uno ti agdama a tawen.
Dandani metten agtallo a lawas a sapsapulen daytoy dagiti kameng ti La Trinidad Municipal Police Station ken dadduma pay a volunteers.
Pinalawa pay dagiti otoridad ti sakop ti search and retrieval operation dagitoy iti namnama a mabirukanen ti nalmes a biktima.
Nupay kasta, saan pay daytoy a nabirukan.
Immunan a kinuna ni PLt.Col. Benson Macli-ing, dadaulo ti La Trinidad Municipal Police Station iti Bombo Radyo, a saan a paglangoyan ti creek a nakatnagan ti biktima ngem limed a nagturongda sadiay kadwana dagiti gagayyemna.
Dinakamat ni Macli-ing a limitado ti panaggaraw dagitoy gapu ta batbato ken nakabutbuteng ti karayan nangruna nu pumigsa ti danum.
Kadwa ti La Trinidad Municipal Police Station dagiti line agencies partikular ti National Bureau of Investigation, Bureau of Fire Protection, opisyales ti Brgy. Balili, volunteers ken daduma pay a mangipatpatungpal iti search and retrieval operation.
