BAGUIO CITY – Ituloy manen dagiti responders ita nga aldaw, Nobyembre 18 ti mangsapul iti maysa pay a nabatbati a biktima ti mudslide sadiay Sumigar, Viewpoint, Banaue, Ifugao.
Sigun ken ni Banaue Mayor Wesley Dulawan, negatibo ti resulta ti naipatungpal a search and retrieval operation idi kalman uray nanayonan ti miembro ti composite team a mangsapsapul iti maysa a nabati a biktima.
Kinunana a 58 a responders ti nagkali iti naun-uneg ken nalawlawa iti Ground Zero agingga iti sumipnget idi kalman.
Sigun pay iti mayor, nakipaset met iti retrieval operation ti 66 a miembro ti composite team iti nagbeddengan ti Linge, Kiangan ken Hungduan agingga iti sumipnget.
Dinakamat ni Dulawan a sabali pay a composite team ti nagsapul iti aglawlaw ti Magat Dam ngem agpapada nga awan ti nasapulan dagitoy.
Mainaig iti daytoy, kinuna ti mayor a simmarungkar iti Ground Zero ni DPWH-CAR Reg’l Director, Khadaffy Tanggol ken dagiti staff daytoy.
Simmangrungkar pay ti regional director iti lamay ti maysa kadagiti biktima a ni Roldan “Janjan” Pigoh.
Binigbig ni Tanggol ti kontribusion ken kinabanuar ni Pigoh ken kadagiti kakadwana.
Immunan a binigbig ni Sec. Mark Villar ti heroism wenno kina-banuar ti lima nga empleado ti DPWH a karaman kadagiti biktima ti nasao mudslide.
Dagitoy da Roldan Pigoh, Joel Ballag Chur-ig, Johnny Duccog, Julius Gulayan, ken John Mutug Limoh.
Maipalagip a makipaset koma dagiti biktima iti clearing operation kabayatan ti bagyo a Ulysses ngem gapu iti napigsa a tudo ket naglinong dagitoy iti maysa a balay.
Nupay kasta, nargaay ti daga iti ayan dagiti biktima a nagresulta iti trahedya.
Immunan a nasarakan dagiti responders dagiti bangkay ti siyam kadagiti biktima ken ita ket maysa laengen ti masapsapul.
