BAGUIO CITY – Pimmusay ti maysa a security officer kalpasan a napalpaltogan sadiay Zone 1, Bangued, Abra idi kanikadua.
Nabigbig daytoy a ni Teddy Laureta Bayugo, 55-anyos ken residente ti Mudeng, La Paz, Abra.
Naduktalan iti inisyal nga imbestigasyon dagiti pulis a pinalpaltogan ti saan pay a nabigbig a suspek ti biktima kabayatan ti panag-uray ti biktima iti misisna a gumatgatang iti maysa a pagtagilakuan.
Nagsagrap ti biktima iti tama ti bala ti paltog iti takiag, luppo ken tiyan.
Naitaray daytoy iti Abra Provincial Hospital ngem pimmusay bayat ti panakatamingna.
Nakarekober met manipud iti nakapasamakan ti insidente ti tallo a basyo ti bala ken dua a buli manipod iti caliber 45 a paltog.
Agtultuloy met ti imbestigasyon ti pulisya iti pakabigbigan ken motibo ti suspek. (-with Bombo Nikki Agsiweng)
