Pagdandanagan ita ni Senator Imee Marcos dagiti damag nga adda dagiti mannalon a maatap a pinagsardegda nga agmula ken nakaawat iti pangta tapno mapapartak ti land conversion kadagiti lugar a tamaan ti Pax Silica Projects idiay Capas, Tarlac.
Gapu iti daytoy, kinidaw ni Sen. Marcos ti naurnos nga imbestigasyon ken pammalawag manipud iti Bases Conversion and Development Authority (BCDA) kadagiti posible nga epekto ti nasao a proyekto kadagiti residente a maapektaran.
Impetteng metlaeng ti senador a saan nga umdas ti kari a bilyon-bilyon a dolyar kas poonan ken panggedan nu ti kasukat met daytoy ti kangrunaan nga income source dagiti mannalon ken dagiti Aeta nga agnanaed iti nasao a lugar.
Sigun gamin iti report, dumanon iti agarup 1,600 nga ekterya ti maapektaran iti kanito a maipatungpal ti nasao a proyekto.
Karaman ditoyen ti pagmulmulaan ti agarup 92 a mannalon iti nasao a lugar.
Sigun pay iti senadora, rumbeng a maaddaan iti konsultasyon sakbay a marugian ti konstruksyon ti proyekto nangnangruna ta rumrumwar iti report nga agkasapulan daytoy iti dakkel a suplay ti danum ken kuryente, banag a kangrunaan a problema ita ti pagilian a Pilipinas. //bombokaren.c.sapirao
