Indepensa ni Senador-Judge Alan Peter Cayetano ni Davao City Mayor Sebastian “Baste” Duterte kontra kadagiti alegasion a posible nga adda ti pakainaiganna iti makunkuna nga “Operation Romanov.”
Inaramid daytoy ni Cayetano kalpasan ti statements ni NBI Regional Director Atty. Jeremy Lotoc iti maikalima nga aldaw ti impeachment trial ni Vice President Sara Duterte idi July 14, 2026.
Iti panagkuestion da Senador-Judges Raffy Tulfo ken Panfilo “Ping” Lacson, kinuna ni Atty. Lotoc a ti mapapati a puntiria ti maatap a pangta ket saan a ni VP Sara, no di ket ni President Ferdinand Marcos Jr. ken ti pamiliana.
Sigun kenni Lotoc, maatap a nakita dagiti imbestigador ti NBI ti statement ni Mayor Baste Duterte kabayatan ti rally idi Enero a dinakamatna ti nagbagan ti pamilia Romanov ti Russia kas pakdaar kenni President Marcos jr.
Maipalagip a ti pamilia Romanov ti naudi a dinastiya dagiti tsar sadiay Russia a napapatay idi 1917 kalpasan ti Bolshevik revolution.
Nupay kasta, kuna ni Cayetano a saan koma a dagus a maibilang a pangta ti dinakamat ni Mayor Duterte ken kinunana nga adda ti nagdumaan ti pakdaar ken ti direkta a pangta.
“It’s fair that you mentioned him. It’s fair that you mentioned him in your investigation. But I don’t think we should draw a conclusion here that Mayor Baste was threatening the First Family,” ti panangilawlawag ni Cayetano.
Impaganetget ti senador a napateg ti panagannad ti impeachment court iti panangipaay iti konklusionna, nangruna ket saan pay a nalawag no ti pannakadakamat ti “Romanov” ket direkta a mainaig iti maysa a plano wenno simbolismo laeng.
Innayon ni Cayetano a masapul a patas ti korte saan laeng iti First Family no di ket kasta met kenni Mayor Baste Duterte ken iti pamilya Duterte bayat nga agtultuloy ti panagdengngeg.
