Idagdagadag ni Senador Lito Lapid kenni President Ferdinand “Bongbong” Marcos Jr. nga ikonsidera ti pannakasuspindir ti fuel excise tax gaputa agtultuloy ti panagngato ti presio iti petrolio a mangpakpakaro iti panagrigat dagiti mangmangged ken small livelihood groups iti pagilian a Pilipinas.
Sigun kenni Senador Lapid, nasken nga inkonsidera ti gobierno ti rekomendasion iti Department of Energy a maactivate ti nasao nga addang nga adda iti sidong iti Republic Act No. 12316 a mangipapaay iti temporario a pannakasuspindir wenno panangkessay iti excise tax kadagiti produkto a petrolio gapu iti kasasaad ti merkado.
Ni Lapid ket co-author ti Republic Act No. 12316 a mangipapaay ti addang para iti pannakasuspindir iti fuel excise taxes a nakadepende iti kasasaad, a tumulong iti mangpalag-an iti kinarigat dagiti konsyumer ken key sectors.
Nakalanad iti linteg, a ti Presidente ket addaan iti karbengan a mangsuspindir wenno mangkessay iti fuel excise taxes nu ti tunggal bulan nga average price iti Dubai crude oil ket dumanon iti threshold nga inkeddeng iti legislation.
Maibasar iti kaudian a datos iti DOE nga imbinglay ni Lapid, ti presio iti Dubai crude ket dumanonen ti $99.41 tunggal barrel manipod iti Agosto 13 agingga iti Setiembre 11, 2026, nangatngato ngem iti $80-per-barrel.
“Napapanahon po na suspendihin ng Pangulo ang excise tax sa mga produktong petrolyo dahil malaki ang maitutulong nito para sa kabuhayan ng ating mga kababayan.”
Kabayatanna, imbinglay met dagiti mangmangged ken small entrepreneurs a ti panagngato iti gastos iti transportasion ken operating costs ket mangapektar metlaeng iti presio dagiti produkto a maiturong iti siudad ken dadduma pay a paset iti rehion Cordillera.
Impeksa met iti opisial a ni mapatgan ti temporario a pannakasuspindir iti fuel excise taxes, mangipaay daytoy iti gin-awa kadagiti konsyumer ken livelihood sectors a naapektaran iti panagngato iti presio iti produkto a petrolio.
Maragsakan met dagiti mangmangged ken babassit a negosyo iti agtultuloy a tulong ken inisiatiba ti senador a tumulong. | 
