Idagdagadag ni Senador Ronald “Bato” Dela Rosa iti House of Representatives Tri-Committee (TriComm) a palawaenda pay ti imbestigasion seknan iti palso a damag babaen iti panangiramanda kadagiti pro-administration social media influencers, imbes a nakapokusda laeng kadagiti vloggers a Diehard Duterte Supporter (DDS).
Kasaruno daytoy ti panangipaulog ti TriComm ti subpoena kadagiti nagduduma social media personalities gapu iti saanda a pannakipaset iti panagdinggeg nupay nakaawatda kadagiti show cause orders.
Kukuwestunaren ti senador ti panagdinggeg nu pudno a nairanta dagiti panagdinggeg a tumulong iti legislation wenno maar-aramat laeng a mangisina kadagiti pro-Duterte vloggers iti agdama administrasion.
Kinuna pay ti senador a siguraduen koma ti TriComm a ti panagimbestigarda ket addayo manipod iti politika.
Ti TriComm a buklen ti Committees on Public Order and Safety, Information and Communications Technology, ken Public Information ket nangipaulog metlaeng iti show cause order iti Facebook Philippines ken ByteDance Philippines, kompania nga agtagikua ti Tiktok.
