Opisyalen nga inyendorso ni Vice President Sara Duterte ni Senator Imee Marcos para iti panagkandidatona iti kinasenador iti 2025 Midterm Elections.
Naipablaak ti video dagitoy idi laeng kalman nu sadino,nakalanad iti caption ti ITIM (Inday Trusts Imee Marcos) bayat nga agpada dagiti dua a nakakawes iti nangisit.
Ni Senator Imee Marcos ket agtartarigagay a mabutusan manen inton May 12 Elections iti kapada metlaeng a posisyon.
Maipalagip a nagbalin a saludsod kadagiti adu a Pilipino nu iyendorso ti bise presidente ti nasao a senador kagiddan ti mapaspasamak a saan a panagkikinnaawatan iti nagbaetan dagiti Duterte ken dagiti Marcos.
Nagbalin metlaeng a saludsod nu nasayaat pay ti linnangen da VP Sara ken Senator Imee kalpasan a pinuted ti bise presidente ti political ties daytoy kenni President Ferdinand Marcos Jr.
Mainaig iti dayta, immuna metten a naglusulos wenno immikkat ni Senator Imee iti senatorial slate iti kabsat daytoy a ni President Ferdinand Marcos Jr. gapu ta sigun kenkuana ket kayatna nga agtalinaed nga independent.
