Impila ita ti Office of the Ombudsman ti plunder ken two counts ti graft cases kontra kenni Senator Jinggoy Estrada gapu iti maatap kickback manipud kadagiti flood control projects iti pagilian.
Maipalagip a daytoy ti maikatallo a daras a napilaan ni Sen. Estrada iti plunder ken dadduma pay a mainaig a kaso iti napalabas a 25 a tawen.
Karaman iti napilaan ti kaso ni sigud a Public Works and Highways secretary Manuel Bonoan, DPWH National Capital Region District Engineers Manny Bulusan, Arturo Gonzalez, Jr. ken Assistant District Engineer Denryl Caesar Cortuna.
Iti agdama, ni Sen. Estrada paylaeng ti highest-ranking nga opisial ti gobierno a sumangsango ti kaso gapu iti isyu ti flood control.
Immuna a nakasuan ti Senador iti plunder idi 2001 gapu iti pakainaiganna iti jueteng, ken plunder, graft, direct and indirect bribery idi 2014 gapu met iti saan nga umno a pannakaaramat ti P183 million discretionary wenno Priority Development Assistance Fund (PDAF).
Naabsuelto daytoy iti kaso a plunder, direct ken indirect bribery, ngem sumangsango pay laeng iti 11 a graft case iti Sandiganbayan mainaig iti maatap a saan nga umno a pannagaramatna iti pondo ti PDAF.
