Kinarit ni House lead prosecutor ken Batangas 2nd District Representative Gerville Luistro ni Senator Ronal “Bato” dela Rosa a personal a dumar-ay iti impeachment trial ni Vice President Sara Duterte.
Sigun kenni Luistro, personal a nagparang ni Sen. dela Rosa para iti panagbotos ti panagsukat ti liderato ti Senado.
Gapu iti dayta, rumbeng met nga ad-adda pay nga ipakita ti Senador ti kinaturedna a mangirisgo iti wayawayana tapno personal a makipaset iti impeachment trial ni Vice President Sara Duterte.
Sigun pay kenni Luistro, ti panagparang ni Dela Rosa tapno personal nga agbotos ket konstitusional a pagrebbenganna kadagiti tattao a nangibutos kenkuana.
Daytoy ti kinuna ni Luistro kasaruno ti naisingasing nga online voting para iti impeachment trial ken ti amin a Senate proceedings.
Ti nasao a singasing ket indatag dagiti kaalyado ni Dela Rosa iti Senado iti baet ti panagregget ti gobierno a mangipatungpal iti arrest warrant nga impaulog ti International Criminal Court (ICC).
