Nakemmeg dagiti otoridad dagiti dua a hacker idiay Tagaytay City kalpasan a pinanggepda nga ilako dagiti rinibribo a personal information dagiti cable subscribers iti nasao a lugar.
Malaksid iti dayta, narekober dagiti otoridad dagiti ado a sensitibo nga impormasyon a pakairamanan dagiti personal information dagiti agarup 300-K a miyembro ti Philippine National Police (PNP) kasta met ti datos ti Philippine Navy maipapan iti West Philippine Sea.
Sigun iti National Bureau of Investigation, dagiti dua a hacker ket nabigbig kas “Newbie” ken “Godlike.”
Inaklon dagiti suspek a manipud tawen 2013 nga agha-hackda kadagiti government websites.
Kabayatanna, kinuna ni National Bureau of Investigation (NBI) Cybercrime Chief Jeremy Lontoc a manarimaan ti panangvalidateda kadagiti nasao nga impormasyon ken nu mapaneknekan nga agpayso daytoy ket ditoyda nga ipaayab dagiti karaman a government ken private entities.
Makikokoordinar met ti Armed Forces of the Philippines iti National Bureau of Investigation para iti verification dagiti datos.
