BAGUIO CITY – Maisimpa dagiti sidewalks iti deppaar ti central business district ti siudad ti Baguio, saan laeng a tapnu mapapintas ngem ketdi, para iti kinatalged ti publiko.
Sigun kenni City Planning and Development Coordinator Architect Donna Tabangin, itarimaan, subliyen ken pasayaaten ti siudad dagiti sidewalks tapnu agbalin dagitoy a natalged, kombeniente ken makaay-ayo iti imatang.
Kinunana a paset ti plano ti panangiyakar dagiti pwesto kadagiti sidewalks iti lakoda wenno pwestoda iti 0.6 meter manipud iti miso a walkway wenno pagnaan.
Inlawlawagna a babaen iti kanayonan nga espasyo ket saan a maokupar dagiti kostumer dagiti mismo a sidewalks wenno pagnaan ken saanda a makasinga kadagiti dadduma a magmagna iti kapada a sidewalk.
Narugian ti sidewalk improvement project ti siudad idi 2019 a naponduan ti P20-M ken nailatangan manen iti kanayonan a P20-M idi napalabas a tawen.
