Impakaamo ti Presidential Anti-Organized Crime Commission a ni sigud a Bamban, Tarlac Mayor Alice Guo ket nagturong kadagiti tallo a pagilian nu sadino ti kaudian ket sadiay Indonesia
Sigun kenni Presidential Anti-Organized Crime Commission spokesman Winston Casio, kumpirmado nga adda iti ballasiw taaw ni Guo babaen kadagiti immigration records dagiti sabali a pagilian nu sadino nagturong ni Guo sadiay Indonesia idi Agosto dise otso.
Kinuna ni Casio a nakadanon ni Guo sadiay Kuala Lumpur, Malaysia idi July 18 bayat a nagturong daytoy sadiay Singapore idi July 21 ken idi Agosto 18, adda daytoy sadiay Batham, Indonesia babaen ti ferry boat.
Kabayatanna, saan a dimmalan ni Guo kadagiti otoridad ti Philippine Immigration iti panagpanaw daytoy iti pagilian a Pilipinas.
Sigun kenni Immigration Commissioner Norman Tansingco, nakaawat ti Bureau of Immigration iti impormasyon a nagbyahe ni Guo sadiay Malaysia idi Hulyo kalpasanna dayta ket maatap a nagturong daytoy sadiay Singapore kaduana da Sheila Guo ken Wesley Guo.
Innayon ni Tansingco nga iti laksid a nakalista ti nagan ni Guo iti Department of Justice’s immigration lookout bulletin, posible a saan a nairekord ti panagpanaw daytoy iti Bureau of Immigration system ken database.
Nu pay kasta, adda ti presensya ti Bureau of Immigration kadagiti amin a regular international ports kas kadagiti airports ken seaports tapno mabantayan ti panagpanaw ni Guo.
Maipalagip a kinuna ni Senator Risa Hontiveros nga inusar ni Guo ti Philippine passport daytoy tapno makapanaw iti pagilian.
