Naarestar ni sigud a Negros Oriental Representative Arnolfo “Arnie” Teves Jr. sadiay Timor Leste ita nga aldaw, sigun iti Department of Justice.
Sigun iti Department of Justice, ni Teves Jr. ket nabigbig kas “terrorist” ken daytoy ket sumangsango iti multiple murder charges nga adda kainaiganna iti pamapapatay kenni Negros Oriental Governor Roel Degamo ken dagiti lima pay nga indibidual idi Marso ti napalabas a tawen.
Ti panakaarestar ni Teves Jr. ket naipatungpal babaen ti nagtinulong a kolaborasyon ti International Police (INTERPOL), National Central Bureau (NCB) ti Dili ken ti kameng ti pulis sadiay Timor Leste.
Iti agdama, adda ni Teves Jr. iti kustodiya ti Timor Leste Police.
Kabayatanna, kinuna ni Justice Secretary Jesus Crispin Remulla a rumbeng a sangoen ni Teves Jr. ti nabayag a nadelay a trial daytoy.
