Nawayawayaan ti sigud nga ahente iti Philippine Drug Enforcement Agency a ni Jonathan Morales manipod iti pannakaibaludna iti Senado.
Kinumpirmar daytoy ni Senate Sergeant-at-Arms Roberto Ancan.
Sigun kenni Ancan, nawayawayaan ni Morales ken ti sigud a National Police Commission staff Eric “Pikoy” Santiago nga agpada a na-contempt bayat ti imbestigasion ti Senado iti mapapati a “PDEA leaked” dokument iti oras ti alas site ti rabii idi kalman, May 23, 2024.
Dinakamat ni Ancan nga agpada a napirmaan ti released custody dagiti dua a sigud nga opisial.
Kabayatanna, kinuna ni Senate President Francis “Chiz” Escudero a timmawag kenkuana ni Senate President Pro Tempore Jinggoy Estrada tapno ipakaammona kenkuana a palubosanna ti pannakawayawaya ni Morales.
Malaksid kenni Senador Estrada, timmawag metlaeng ni Senator Ronald “Bato” dela Rosa kenni Senador Escudero a mangkidkiddaw a mapalubusan ni Santiago.
Maipalagip a ni Estrado ti nangibaga a ma-cite in contempt ni Morales gapu iti panagulbodna maipapan iti personal a data sheet daytoy a naisubmitir iti PDEA idi nagaplikar daytoy kas maysa nga “agent”.
Ni Dela Rosa, a mangidadaulo iti imbestigasion iti Senado maipapan iti “PDEA leaks” ket nagdesision a ma-cite in contempt ni Morales gaputa inaklonna a nagulbod daytoy tapno agparang iti panagimbestigar ti Senadi iti nasao a banag.
