![](https://img.bomboradyo.com/baguio/2020/03/Covid-19-News-Update.jpg)
BAGUIO CITY – Kinumpirmaren ti Research Institute for Tropical Medicine (RITM) positibo iti COVID-19 ti 55-anyos a babai a residente ti Baguio City a pimmusay idi pay March 19.
Gapu iti daytoy, dumanonen iti 14 ti pakabuklan a bilang dagiti nagpositibo iti COVID-19 ditoy Baguio, pakairamanan dagiti lima a nagimbagen ken nakaruaren kadagiti pagagasan.
Sigun kenni City Health Officer Dr. Rowena Galpo, nagpositibo ti inisyal a COVID test ti nasao a pasyente a naisayangkat idi March 18 sadiay Baguio General Hospital and Medical Center.
Kalpasanna ket impatulodda ti sample iti RITM para iti kumpirmasyon.
Nailista met ti nasao a pasyente iti presumptive COVID death iti case tracker infographics ti Baguio.
Maibasar iti impormasyon, ti pasyente ket maysa nga empleyado ti gobyerno a pimmusay gapu iti respiratory complications nga intunda ti coronavirus.
Na-cremate ti bangkay daytoy sumagmamano nga oras kalpasan a pimmusay kas maitunos iti protocol kadagiti matmatay nga indibidual gapu iti COVID-19.