Napaneknekan ti Sandiganbayan a “guilty” wenno nagbasol ni sigud nga Autonomous Region in Muslim Mindanao (ARMM) governor Nur Misuari ken innem a dadduma pay iti dua a kaso ti graft gapu iti panaggatangda ti aggatad a P77 million a “learning tools” manipod 2000 agingga 2001.
Sinentensiaan ti Sandiganbayan Third Division ni Misuari iti innem agingga walo a tawen a pannakaibalud iti tunggal kasona a graft.
Ti agpada a kaso ket maipataw metlaeng iti innem a kakadua ni Misuari a da Leovigilda Cinches, Pangalian Maniri, Sittie Aisa Usman, Alladin Usi, Nader Macagaan ken Cristeta Ramirez.
Maipalagip nga indepensar ti sigud a dadaulo iti Moro National Liberation Front (MNLF) ti bukkodna ken kinunana nga awan ti pakainaiganna iti P77 million a gatad dagiti ginatangna a learning tools gaputa kumpleto daytoy sakbay pay ti panagtugaw ni Parouk Hussin manipod 2003 agingga 2004.
Kiniddaw ni Misuari ti pannakaikkat ti kasona idi Setiembre 2018 ken dinakamatna nga awan ti ebidensia a mabalin a pakainaiganna iti iregular a transakson.
Nupay kasta, pinaglibakan ti Sandiganbayan ti panagpakaasi ni Misuari ket indagadagda nga idatagna daytoy iti umno a korte.
Nangipila pay ni Misuari ti “motion for reconsideration” iti Sandiganbayan idi Enero 14, 2019 ken impaganetgetna a rumbeng a saan a makasuan daytoy iti transaksion a nagleppas idi saanen a gobernador iti lugar dagitoy.
