Supsuportaran ti Department of Health ti singasing a 30 kilometer per hour speed limit kadagiti siudad tapno malapdan ti pannakaidungpar iti kalsada kagiddan ti panangibaga ni Health Secretary Teodoro Herbosa a top killer kadagiti agtutubo a Pilipino dagiti vehicular incidents.
Maibasar iti panagadal, ti pannakaidungpar iti kalsada ti kangrunaan a rason ti ipupusay dagiti Pilipino nga agtawen ti lima agingga iti duapulo ket siam, sigun kenni Herbosa.
Iti datos ti Philippine Statistics Authority, dumanon iti 13,101 ti pimmusay gapu iti “road crashes” idi tawen 2023.
Kabayatanna, kinuna ti Department of Health a masapul a maadal manen ti pannakaipatungpal dagiti agdama a linteg gaputa nangato latta ti bilang dagiti matmatay iti baet nga adda dagiti polisia maipapan iti panangaramat ti helmet, seatbelt ken car seats para kadagiti ubbing.
