BAGUIO CITY – Impasigurado ni outgoing Mayor Mauricio Domogan ti smooth transition iti kanito nga agtugaw iti pwesto inton June 30 dagiti incoming city officials nga idauluan ni Mayor-elect Benjamin Magalong.
Naamuan a binukel ti mayor ti maysa a local governance transition team a mangidaulo iti epektibo a turn-over dagiti responsibilidad, sanikua, rekord ken logistics kadagiti baro nga opisyales ti siudad.
Ipasigurado ti team nga amin ket nakasagana para iti implementasyon dagiti development programs nga impangruna ti administrasyonna ita a tawen.
Kagiddan iti daytoy, inkarina nga iti baet ti panakapaayna iti nagkandidatuanna ket tumulong latta daytoy iti nagduduma nga addang para iti panagdur-as ti siudad.
Pinagyamanan met dagiti dadaulo dagiti departamento iti city government ti mayor ken ti lideratona nga inladawanda a participative ken integrative.
Maipalagip a nangrugi ti political career ni Domogan idi 1987 ken nabigbig daytoy kas “The Janitor of The City”.
