BAGUIO CITY – Nailukaten ti special lane kadagiti quarantine checkpoints ditoy siudad iti Baguio para iti nalaklaka a panagbiahe dagiti lugan a naglaon iti taraon, dagiti lugan ti gobyerno ken dagiti lugan a naglaon kadagiti frontliners iti kampanya kontra iti COVID-19.
Iti panakiyuman ti Bombo Radyo Baguio kenni PLt. Benedicto Duntogan, dadaulo ti Operations Unit ti Baguio City Police Office – Station 2, kinunana a ti inner lane iti checkpoint ti agserserbi nga special lane bayat a ti outer lane ti para kadagiti lugan dagiti sibilyan.
Sigun kenkuana, dagiti damo a sumrek iti siudad a magna iti special lane ket nainget a masukimat ngem dagiti siguden a lumablabas ket saanen a maipasidong iti kapada nga inspeksion.
Inlawlawagna a naing-inget ti panakasukimat dagiti lugan a lumabas iti outer lane ti kalsada, partikular iti papeles wenno dokumento kas iti travel pass dagiti nakalugan.
Sigun kenkuana, dagus a mapasubli iti nagtaudanda dagiti lugan nga awanan ti kaskenan a dokumento ken saan dagitoy a mapalubusan a makastrek iti masakupan ti Baguio.
Dinakamatna nga adu dagiti saan a napatgan a makastrek ditoy siudad gapu iti kaawan ti dokumento dagitoy bayat a kaaduan a napatgan a sumrek ket dagiti addaan pasahero nga apan agpalengke ken dagiti agitulod ti trabahador.
