Dagos a naitaray iti ospital ita a rabii ti maysa a kameng ti staff ni Vice President Sara Duterte iti tengga dagiti saludsod maipapan iti pannakaammona kadagiti nagpirma kadagiti resibo a nausar a mangikalintegan iti pannakaipaulog ti P125 milion a confidential funds ti Office of the Vice Presidente (OVP) idi 2022.
Naimatangan a naitaray ni Special Disbursement Officer Gina Acosta of the Office of Vice President (OVP) paruar iti Batasang Pambansa a nakalugan iti wheelchair iti agarup alas sais trenta ti malem iti tengga ti agtultuloy nga imbestigasion ti House good government and public accountability panel iti pondo a naaramat ti Office of the Vice President ken ti Department of Education (DepEd) bayat ti panatakem ni Duterte kas Education Secretary.
Ni Vice President Duterte a nakipaset iti panagdinggeg ti nasao a komite ket kinaduanna ni Acosta agingga a naiyakar iti ambulansia a nangiturong kenkuana iti Veterans Memorial Medical Center (VMMC), sigun iti statement manipod iti OVP Legal Office.
Sigun met kenni House Deputy Speaker Jay-jay Suarez, ti blood pressure ni Acosta ket ngimmato iti 150/100.
Sakbay a nagsakit, kinuna ni Acosta nga impaayna ti P125 million a gatad ti OVP confidential funds iti maysa a partikular a “Colonel Lachica” a mangidadaulo iti Vice Presidential Security and Protection Group (VPSPG) uray no daytoy ti disbursing auditor.
