BAGUIO CITY – Imbinsa-binsa ti Commission on Higher Education (CHED) – Cordillera dagiti rason iti pannakapaisardeng ken saan a pannakaituloy ti Senior High School (SHS) program kadagiti state, local universities ken colleges.
Iti interview ti Bombo Radyo kenni Dr. Demetrio Anduyan Jr., Regional Director ti CHED-CAR, inlawlawagna a ti Department of Education (DepEd) ti mangidiaya iti nasao a programada gapu ta mandatoda ti pannakaipaay ti basic education pakairamanan ti pre-school agingga senior high school.
Kinunana met mandato ti Technical Education and Skills Development Authority (TESDA) ti mangipaay ti technical vocational education bayat a ti mandato ti Commission on Higher Education (CHED) ket mangipaay ti degree courses ken doctorate courses.
Impeksa ni Anduyan a timmulong laeng ti CHED iti transition period ti K-12 idi 2016 gapu ta saan pailaeng a nakasagana dagiti pagadalan a mangipatungpal ti senior high school partikular ti kinakurang dagiti pasilidad ken mannursuro.
Maipalagip a maysa ti Benguet State University kadagiti unibersidad iti Cordillera a nangidiaya ti Senior High School ngem saanen daytoy nga agawat iti agdama gapu iti pammilin ti Commission on Higher Education.
Immuna metten a kinuna ti central office nga awan ti mannursuro a mapukawan ti panggedan gapu iti saanen a panangidiaya dagiti state, local universities ken colleges ti senior high school program.//Marielle Apat
