BAGUIO CITY – Agsagsaganan ti Philippine Statistics Authority (PSA) – Cordillera ti Step 2 wenno ti maikadua a proseso ti panagparehistro iti Philippine Identification System ID wenno National ID sadiay probinsia ti Benguet.
Iti panakiuman ti Bombo Radyo Baguio, kinuna ni PSA-Cordillera Chief Administrative Officer Adrian Cerezo a nangrugin ita nga aldaw ti panagsanay dagiti nadutukan a mangimaton iti Step 2 ti panagparehistro sadiay Tublay ken Mankayan.
Inlawlawagna a dagitoy paylaeng ti umuna a munisipyo iti Benguet a maipasidong iti Step 2 ti panagparehistro gaputa lima laeng a registration kits ti naipatulod nga aramaten ti probinsiya.
Impanamnamana met nga apaman a sumangpet dagiti kanayonan a registration kits ket maisarunon dadduma pay a munisipyo ti Benguet sakbay a maisaruno ti Baguio City inton Setyembre ti agdama a tawen.
Impannakkelna pay a nagun-oden ti puntiryada a bilang nga agparehistro iti umuna a proseso ti panagala ti National ID.
Kinunana nga agarup 588,300 nga indibidual iti Cordillera ti nakapagparehistro para iti National ID ken nangatngato daytoy no idilig iti 433,000 a puntiryda a bilang.
Nupay kasta, kinuna ni Cerezo a mabalin latta nga agrehistro iti philsys.gov.ph dagiti indibidual a saan a nakapagparehistro kabayatan ti house-to-house ti Step 1 ti panagparehistro.
Innayonna pay a manarimaan ti panagparehistro dagiti umili sadiay Ifugao, Kalinga ken Mountain Province para iti Step 2 wenno maudi a proseso, no sadino, kasapulan a personal nga agturong dagitoy kadagiti nabigbig a registration area tapno maalaanda ti biometrics.
