BAGUIO CITY – Adda dagiti sumagmamano a Pilipino a nakipaset iti panagraut dagiti Trump supporters iti U.S. Capitol itay laeng nabiit.
Iti interview ti Bombo Radyo Baguio kenni Bombo International Correspondent Luz Rebecca Sumingwa sadiay Maryland, U.S.A, imbinglayna nga adda dagiti kailyan a Pilipino a nakipaset iti nasao a rally.
Kinunana a naamuanda daytoy babaen kadagiti post iti social media dagiti mismo nakipaset iti nasao a rally.
Innayonna a karbengan dagiti kailyan ti panakipaset dagitoy iti nasao nga aksion.
Nupay kasta, maseknanda iti agbalin a gasat dagiti nasao a kailyan nangruna ta nangrugin ti panangbigbig ken panangtiliw ti gobyerno ti Amerika kadagiti nakipaset iti nasao a rally babaen iti panangbigbigda kadagiti naipablaak a rupa kadagiti social media sites.
Inaklon met ni Philippine Ambassador to the United States Jose Manuel Romualdez nga adda dagiti Pilipino a Trump supporters a nakipaset iti panagraut iti Capitol Hill tapnu mapasardeng ti panangbigbig ti Kongreso ti Amerika iti panangabak ni incoming U.S. President Joe Biden.
Sigun kenkuana, dagiti nasao a Pinoy ket nagbiahe pay paturong sadiay Washington DC ken nagtaudda iti nagduduma nga estado ti Amerika.
