Agrekreklamo dagiti sumagmamano a surveyor iti Philippine Statistics Authority-Benguet kalpasan a saan a naipapaay ti sweldo dagitoy.
Maipalagip a maysa a surveyor ti personal a nagmessage ti Bombo Radyo FB page a mangipekpeksa ti liday ken dismaya dagitoy kalapasan a saan a naipapaay ti sweldo-da manipud iti bulan ti Agosto.
Iti panakiuman ti Bombo Radyo, iti maysa kadagiti nadelay ti sweldona awan met ti problema kadagiti naglablabas a tawen.
Inlawlawagna a saan laeng met nga ita a madelay ti sweldo dagitoy ngem ita laeng a nabayagan ti panakaitantanna no sadino ket agarup tallo bulan payen ti naglabas.
Impeksana pay nga ad-adda nga strikto ita ti accountantda agsipud ta nasukatan ti sigud nga accountant dagitoy.
Kiddaw met dagitoy a sapayla kuma ta maikonsidera dagitoy nangrunata addaan dagitoy iti pamilya a bibyagen.
Iti inisyal a panakiuman ti Bombo Radyo iti maysa kadagiti empleyado ti Philippine Statistics Authority-Benguet, kinunana nga awan paylaeng ti statement wenno sungbat dagitoy agsipud ta saanda nga ammo no anya a programa dagiti agrekreklamo.
Nupay kasta, kinunada a narisut metten dagiti dadduma a naitantan ti sweldona ngem adda pay dagiti nabatbati a saan a naipaayan iti sweldo.
Inlawlawagda pay a nu survey nasken a makaisumitir iti amin a requirements dagiti grupo tapnu makasweldo dagitoy.
Dagiti requirements ket pakairamanan ti Daily Accomplishment Report (DAR), Ceritificte of Appearance , Itinerary ken Daily Time Record wenno DTR.
Gapu iti dayta, nu adda ti dua nga indibidual iti maysa a grupo a saan a nakakumpleto kadagiti nasao a requirements ket mairaman amin dagitoy a maitantan ti sweldoda.
Kinunana met ti nakauman ti Bombo Radyo nga awan ti narigat a mai-accomplish ngem ti narigat ket ti panakakumpleto ti quota dagitoy a 30 households nangruna kadagiti naidestino kadagiti adayo a lugar nga agi-inadayo met dagiti babalay
Iti baet dayta, kiddaw dagiti agrekreklamo a nu mas adu dagiti nakakumpleto ket maited kuma dagiti sweldo dagitoy ta uray saan pay dagiti saan a nakumpleto iti reportsda.
Padpadasen metten ti Bombo Radyo nga agala iti kanayonan a detalye manipud iti nasao nga opisina.//Bombo Noveh Organo
