![](https://img.bomboradyo.com/baguio/2020/04/lachica-UAE.jpg)
BAGUIO CITY – Pagyamyamanan ti maysa nga OFW sadiay Dubai, United Arab Emirates ti panangited kadakuada ti pagtatrabahuanda a kompanya iti tulong pinansial kalpasan a naapektaran dagitoy iti COVID-19 pandemic.
Iti interview ti Bombo Radyo Baguio kenni Lloyd Lachica, Pinoy worker sadiay Dubai, UAE ken tubo ti Santa Cruz, Ilocos Sur, kinunana a nasurok makabulanen nga awan ti ar-aramiden dagitoy ken saanda a makaruar gapu iti lockdown sadiay kalpasan a temporaryo a nasuspindir ti trabaho dagitoy.
Kinunana a dakkel ti multa ti asinoman a makemmeg iti kalkalsada gapu iti panaglabsing dagitoy kadagiti pagalagadan kas iti kaawan permit, facemask ken gloves.
Innayonna a no gangannaet dagiti makemmeg ket mabalin dagitoy a maibalud, mamulta ken maipadeport nupay depende iti kadagsen ti panaglabsing dagitoy.
Imbingay nga iti dadduma a pasdek sadiay ket nai-lockdown gaputa adda dagiti gangannaet a nagpositibo iti COVID kas kadagiti nagtaud sadiay China.
Dinakamatna a kanayon ti panang-sterilize dagiti otoridad sadiay kadagiti kalsada ken malls bayat a kaaduan a masitsitar ken makemkemmeg gapu iti panaglabsing iti lockdown laws sadiay ket dagiti gangannaet kas iti Russian ken dadduma nga Arabo.
Sigun pay kenkuana, addan ti pimmusay sadiay UAE a Pinoy gapu iti COVID-19 ngem saan a nairuruar iti media wenno adda ti news black out iti daytoy malaksid pay nga adda dagiti nadamagda nga adda dagiti Pinoy sadiay a naakaran ti nasao a virus.
Innayonna a nasayaat ti kasasaad dagiti frontliners sadiay UAE, pakairamanan dagiti Pinoy gaputa suportado dagitoy ti gobyerno sadiay.