Inwaragawag ti National Police Commission (Napolcom) a posible a karaman ti sumagmamano a police generals kadagiti indibidual nga adda pakainaiganda iti pannakapukaw dagiti 34 a Sabungeros.
Sigun kenni Napolcom Vice Chairperson and Executive Officer Rafael Vicente Calinisan, saan laeng a naibasar daytoy iti imbutaktak ni whistleblower Julie “Dondon” Patidongan.
Maipalagip nga 18 a police officers, 12 kadagitoy ti aktibo iti serbisio ken innem ti immuna a naikkat ti karaman iti complaint-affidavit ni Patidongan.
Sigun pay kenni Calinisan, adu paylaeng dagiti nagan nga imimbestigaranda a pakairamanan dagiti high-ranking officials.
Nupay kasta, saanen nga imbutak ti nasao nga opisial dagiti nagan ti sumagmamano a heneral a maatap nga adda pakainaiganda iti kaso dagiti sabungeros.
Inlawlawagna a nasayaat a bay-an dagitoy nga agimbestigar tapno maliklikan a manayunan dagiti mangpadpadas a makibiang iti nasao nga imbestigasion.
