BAGUIO CITY – Maisaysayangkat ti surprise inspections kadagiti nagduduma a business establishments ditoy siudad ti Baguio tapnu maipasigurado ti panagtulnog dagitoy kadagiti paglintegan iti sidong ti Alert Level 3.
Sigun kenni City Permits and Licensing Division Chief Allan Abayao, agarupen iti 41 nga establishimento kas iti panganan, bangko, salons ken drug stores ti impasidongda iti random inspections ita a lawas.
Partikular a nasukimat kadagitoy ti panagtungpalda kadagiti probisyon ti Executive Order No. 5-2022 a nanglimitar iti bilang dagiti kustomer a maakomodar kadagiti nasao a pasdek.
Maipalagip a para iti food and beverage retail establishments nga addaan ti dine-in services ket 30% capacity ti naipalubos para iti indoor setting dagitoy para kadagiti fully vaccinated individuals laeng bayat a 50% para iti outdoor.
Dinakamatna nga amin a maaktuwan a saan nga agtungtungpal iti pammilin ket maipaayan ti notice of violation ken maballaagan.
Karaman iti pannusa dagiti maaktuwan nga aglabsing ket ti panakawaswas ti safety seal certification dagitoy.
Immuna metten nga impetteng ni Mayor Benjamin Magalong ti nainget a panagtungpal dagiti business establishments kadagiti protocols tapnu masalwadan ti salun-at dagiti kustomer ken dagiti empleyado ti establishimento nangruna ita a mapaspasaran ti panagngato manen ti kaso ti COVID-19 iti siudad a mapapati nga ituntunda ti baro nga Omicron variant.
