BAGUIO CITY – Maan-anop ita ti suspek a nangbasol iti katrabahuanna sadiay Laya West, Tabuk City, Kalinga idi Martes.
Nabigbig daytoy a ni Romel Israel a tubo ti Albay, Bohol bayat a nabigbig ti biktimana a ni Robert Andaya a tubo ti Dumaguete City, Negro Oriental ken agpada dagitoy nga stay-in laborer iti nasao a lugar.
Naduktalan iti imbestigasyon nga intulodan ti biktima iti pangrabian dagiti kakadwana a trabahador iti bodega ti bagas sadiay Laya West ken idi pumanaw kuman babaen iti motorsiklona ket sinurot daytoy ti suspek.
Ditoy a killaat a binagsol ti suspek ti likod ti biktima.
Dagus a naitaray ti biktima iti ospital bayat nga iti panagresponde dagiti pulis ket naamuan a naglibas ti suspek.
Naamuan pay iti kanayonan nga imbestigasyon a makalawas sakbay ti pammagsol ket adda ti nakakita a naaddaan ti suspek ken biktima iti nabara nga argumento.
Gapu iti daytoy, patien ti pulisya a ti pammagsol ket resulta ti nasao nga insidente gapu iti rurud ti suspek iti biktima.
