Manarimaan paylaeng ti imbestigasyon dagiti otoridad seknan iti maatap a robbery with intimidation a napasamak idiay Richwood Square Subdivision, Dizon Manzanillo, Baguio City idi August 28, 2025.
Maibasar iti report iti Baguio City Police Office-Police Station 2, dagiti biktima ket lalaki ken babae a senior citizen nga agpada a residente iti nadakamat a lugar.
Sigun iti kapulisan, imbinglay kadakuada iti maysa kadagiti biktima nga immasideg dagiti dua a lallaki iti luganda apaman a sumrekda koman iti gate ti Richwood Square.
Maysa ti nagturong iti driver side, maysa iti passenger side.
Idi inroll-down ti biktima ti tawa ti lugan,kinunana a dita metten nga insawang ti suspek ti hold-up ken intutokna ti paltog.
Kagiddan dayta, nangikabil met ti suspek nga adda iti passenger side ti metal spike barricade iti front wheel, linukatanna ti ridaw ken innalana ti handbag a naglaon iti cash a ₱98,000 ken nagduduma a susi.
Kalpasan dayta, dagus nga immalis dagiti suspek usar ti black/blue Mio a motorsiklo paturong iti Guisad Central.
Saan pay a naduktalan ti pakabigbigan dagitoy.//Bombo Noveh Organo
